FAUZI SALAKA

Sampurasun.......... Bagea Baraya !!

2009-03-25T05:57:00.000-07:00

Lengkah munggaran dina muka lawang, sim kuring bade kumawantun ngawanohkeun sajak-sajak Sunda karyana para pangarang Sunda jaman taun opat puluh limaan sareng pangarang Sunda entragan anyar, dicandak ti perpustakaan Sunda atanapi anu langsung ngintun ka redaksi . Oge diselipkeun ngeunaan sajarah Sunda, sok sanaos mung garis badagna wungkul. Lengkepna mah tiasa nyumpingan Majalah Basa Sunda SALAKA Online (www.salaka.net)
Atuh kanu pakuat-pakait sareng sajak-sajak anu dimuat di ieu Blog ulah rengat galih, margi sim kuring ngawanohkeun ieu sajak gaduh maksad hoyong ngamumule basa sareng sastra Sunda anu sasatna geus kari tulang talengna. Anu kacida matak nyerina, Sunda entragan anyar boh barudak, boh rumaja siga anu geus teu bareukieun kana basa Sunda teh. Padahal basa Sunda ku batur mah (panaliti basa) basa anu pangendahna katilu sa dunya. Tapi kanyataanana, basa Sunda hirup teu neut paeh teu hos, nguriang di tanah angar.
Pamungkas, kugelarna ieu Blog sing jadi kareueus numbas papagon ; leungit basana, leungit bangsana, hamo ulah kaalaman. Dina harti basa jeung etnis Sunda angger ngalagena dina peta Bhineka Tunggal Ika. Cag.

Cobi ieu aos : sajak tina Dangdanggula Laut Kidul karyana Kalipah Apo ( R.H.Muhammad Sueb) anu dimuat dina Kanjutkundang.

Wantu-wantu sindir mah sindir,
wantu-wantu basa mah sabasa,
ngan beda nu kapiraos,
catur ki juru pantun,
juru pantun anu berbudi,
pantun ti Pajajaran,
nu ti kun payakun,
nyaos pieusieunana,
sindir hiji di mana waliwis mandi,
mandi di pangguyangan.

Pangguyangan-pangguyangan kuring,
pangguyangan-pangguyangan urang,
urang nu keur ngalun,
lalakon nu keur ngalun,
pada-pada boga pamanggih,
pada boga carita,
pada boga galur,
gok amprok jeung sasamana,
mararantun aya nu pait nu amis,
baralik kari ngaran. Cag.

----------------------------------------------------------------------------------
Hiji deui sempalan sajak Kang Jus Rusamsi nu aya dina fauzisalaka.blogspot.com (mangga geura buka) :

..................................tapi kiwari
deudeuh teuing Bandung kuring
kadatangan nu baredang
kaimpungan nu umaing
nu ti alas nu ti peuntas
nu asli nyigi (nyedek) nyarisi
hiji tantangan nu narajang.

-----------------------------------------------------------------------------------

Bilih para wargi, Bapa sareng Ibu,Teteh sareng Aa, Ujang sareng Nyai bade ngintun SAJAK, mangga diantos. Tong hilap alamat bumina, pami gaduh sareng surelekna.
Kintunkeun bae ngalangkungan surelek (email) :
suparyatfauzi@ymail.com

Sim Kuring :
Kang Fauzi
Ti kampung bau lisung,
sarakan di Majalaya mung ayeuna nganjrek di Bandung
Mangga atuh linggih ka saung butut. Diantos !

Diantos pisan kintunan sajak-sajakna.Hatur nuhun

---------------------------------------------------------------------------------

WANGSIT SILIWANGI

"Pun sadu sadat Sunda
Twan katata twan katepi
Selam larang tan kasarang
Tan urang haji pakuan "

Hartosna :
Urang pada-pada Sunda, saadat, sagurat,sakokocoran, saturunan (ulah parasea)
Teangan elmu nepi ka anggeus
Islam suci teu di carek
Keur urang nagara Pakuan.

PRASASTI KAWALI

"Nihan tanpa kawali nu siya mulia tanpa raja wastu mangadeg di kuta kawali nu mahayu na kadatuan surawisesa nu marigi sakuriling dayeuh nu najur sagala desa aya ma nu pa (n)deuri pakena dawe rahayu pakeun heubeul jaya di buana.
Aya ma nu ngeusi bhagya kawali bari pakena kereta bener pakeun na(n)jeur na juritan "

foto Prasasti KAWALI kintunan : Moh.Asep Ramdan,S.pd
Hartosna (ku basa Indonesia we nya?)
"Yang bertapa di Kawali ini adalah yang mulia pertapa yang berbahagia prabu raja wastu yang bertahta di kota Kawali yang memperindah keraton surawisesa membuat parit keliling ibukota, mensejahterakan seluruh negeri. Semoga ada yang kemudian membiasakan diri berbuat kebajikan agar lama berjaya di dunia.
Semoga yang ada kemudian yang mengisi negeri Kawali dengan kebahagiaan, membiasakan berbuat kesejahteraan sejati agar tetap unggul dalam perang." (kropak 632 dan 630 lembar 26 dan 27 dengan bahasa Sunda Kuno di Museum pusat Jakarta)

SUMPAH BUBAT

"Niham ta wuwusna rudiarana iking Bhubat sabha,namung ka satrya Sunda tan atemahan ring nagara pada jaya mami"

Hartosna : Najan Banjir getih, bedah di Palagan Bubat, cadu ksatrya Sunda ancur ajen diri di lemah cai sorangan."

Seratan dina Batu Tulis BOGOR sareng hartosna, tiasa dipilari di kaca sanes.
----------------------------------------------------------------------------------
Karajaan-karajaan di Jawa Barat anu merentah leuwih 100 taun ngan aya 2 (dua) nyaeta : Prabu Darmasiksa (akina Raden Wijaya, anu ngadegkeun Majapahit) salila 122 taun ( 1175 - 1297 M) jeung Wastukancana salila ampir 104 taun ( 103 tahun 6 bulan 15 poe ) ti taun 1371 - 1475 M. Cag
----------------------------------------------------------------------------------
Mangga pilari di kaca sanesna ngeunaan : Perang BUBAT,Prabu Siliwangi, Baduy, Aksara Sunda, AKI TIREM sareng nu sanesna. Palih katuhu tiasa dibuka dina Daftar Eusi !!! Hatur nuhun.

Upami para wargi gaduh peperenian sajak-sajak parasepuh urang, mangga kintun ka redaksi ngalangkungan surelek (e-mail) di luhur.Tong hilap sebatkeun jenengan anu jelas, surelek sareng padumukan. Hatur nuhun. Diantos !. cag.

PERYOGI KA UNINGA :

Parantos ditambih ku : Sajak Drs.Asep Idjuddin, sajak EDDY D ISKANDAR,sajak WAHYU WIBISANA, sajak KUSNADI (edi)PRAWIRA SUMANTRI (1958), KANG FAUZI II ( 2008), sajak DJALALUDIN RUMI ( 672 H - 1273 H), sajak ESON SUMARDI ( 1959).

Seuseueurna gambar dicandak tina :

@fauzisalaka.blogspot.com dipayungan ku Undang-undang Surelek (E-mail) fauzi@salaka.net - suparyatfauzi@ymail.com HP : 08112229522

Asep Idjuddin

2009-03-09T20:44:00.000-07:00

Rd.DEWI SARTIKA

Ngaharewos satengah riwan
Hawar-hawar lir midangdam
Antara percaya jeung henteu
Lamukan kaagungan jeung karancangna kayakinan
Malah panalek nu murudul
Naha enya kungsi ngacak-ngebur tatanduran?
Asa cangcaya da puguh keur talibra
Taya nu inget sasiki,
Jongjon dina aweuhan global jeung hedonis
Teu matak ngusikkeun kalakay
Mun lambaran kahayang datang neang kalangkang
Paselang rambat-kamalena wawanen jeung panapian
Lengkah teh teu kaur panceg
Pedah palataran robah jadi tegal ngahgar
Embel kawah ge milu baribin
Mopohokeun katineung nu kungsi manjing
Peuting eta beurang ieu
Sasaka ngulahek dina lahunan
Bongan curuk panunjukan kajabel murilitna peujit
Teu kabaca salaka kalinggamurda
Apan aweuhan katilep ku sora bom nu mahabu unggal juru
Tapak lacak nu tiheula di koreh ku tungtung irung
Nu nyampak ukur babancong nu geus dikuriling sepi
Tong boroning geprak, surak ge teu walakaya
Da nu di mumunggang kapireupeunan
Nu di landeuh kababuk tihul
Sumawonna nu ngarongheap susuluduk lir ngalindur
Tungtungna,
Nu aya ukur bangkarak,
Taya nu mirosea
Da geus kaleungitan jati.

(Mahabu moro julang ngaleupaskeun peusing
Kumaha pikahareupeun?)

TOTONDEN

K olot ulah miharep hayang dihormat ku anak
Pamingpin ulah mikahayang diajen rahayat
Pamajikan nu taat satia satuhu ukur beja dongeng
Apan tatakrama geus kaleled elmu pangaweruh
anting ku kamiskinan
Najan taya nu langgeng, tapi meungkeut kayakinan
Indung tunggul rahayu bapa tangkal darajat, ukur carita baheula
Duit duit jeung duit nu dipuja jeung dipuhit
Nepi ka ngabarak unggal lengkah doraka murba
Naon arep-arepkeuneun?
Basa paeh ,tatakrama ngabangkarak ,doraka jeung pamali bandana budak baheula
Teu modern, teu ilmiah,mun teu kakurung culangung
Teu demokratis teu modis mun teu satata jeung tangkal
Taktak luncat ngaluhuran sirah

Naha enya letah bisa katitipan jati?
Payu keneh kitu ayat-ayat langit dina alam nu sengit?
Atawa ukur lalambe keur ngala duit?
Ti poe ka poe
Ray beurang reup peuting
Rup ku padung rap ku lemah
Tanah janah ngambang di awang-awang
Tunggul jeung sirung
Tutung
Dina bangbarung
(Totonden piucutaneun?)

TALEOT

Sorana angger ngageuri lir Jayanti mipir peuting
Wangunna taya nu robah iwal biwir jeung ramo nu geus papisah
Tarompet geus maluguran
Kapiteskeun galura clarinet
Taleot ngaraja sawah
Leuwih tiheula beungbeung kaidek pabrik jeung mall
Dibawa nganjang kana jajaran hareup, horeng merod mudun ka burih subuh
Karinding nu kamari nyaring
Ngingkig ngabirigidig kajiwir angin pandeuri
Naon nu rek diasongkeun
Naon nu rek disuguhkeun
Da puguh taya nu nyesa
Taya sakalieun ubar
Dogdog reog kaberod ku bedong kopong
Calung angklung mangprung ka sampiung
Gondang jongjang mayang jeung tampele tanpa gedang
Sagala karasa hareudang bayeungyang taya kabetah
Karebut ku dangdut, karampog ku rocki
Katalimbeng angen-angen nu ngagajlok ka mangsa engke
Taleot peot ngulahek
Ngagubrag ka jungkrang tina eundeuk-eundeuk cang lagoni.

JALEULEU

Nu kungsi ngengklak ka bawa rayak-rayak
Kurung hayam tina lisung
Nyurungkuy mupuhu kidung
Ngadulungsung bangun teuneung teu kabendung
Nu ngagoak lebah lawang
Ngarongkong totopong ranggon
Budak angon nu ngelak di bubulak
Nangkarak teu walakaya
Ja heueuh jalu
Ganti wayah ganti lengkah
Kolu pindah pileumpangan
Tulaktuja meupeuskeun gog
Seureuh leuweung meuweuh keueung
Songsong ngiles ngontrog ucing
Ngek jeung bay ngajengkang di balandongan
Imah ngambang di lautan
Narucing ka puhu bitis
Budak leutik ngambay peujit
Kateguh jumarum kuning
Jaleuleu keudeu aweuhan
Urang lembur katalimbeng
Caang bulang jadi matak
Nongerak
Ruksak ku lampah.

KEUYANG

Basisir bodas ngaprak lamunan
Penyu nyumput nyuhun jukut
Lebah lambak ngangkang keuyang midang
Muru indung rajungan
Najan bapa lain kapiting atawa keuyeup soeheun
Lambak murungkut keuyang nyangsang
Pahibut ngalian liang
Mun kagebrag ngaler ngidul
Teu bina ti Sunda tumpang
Leungit iteuk cecekelan
Ngorondang handapeun kangkang
Teu wasa cengkat
Teu wasa ngomong
Teu wasa nangtang
Teu wasa hayang
Teu wasa baha
Sagala kumaha hyang
Da awang-awang ngalangkang
Sumerah kana pawarang
Nyao hyang nu ti mana, da geuning ngadadak loba
Matak ringrang unggal hudang
Antukna ngabarungsinang
Neang caang ku kalangkang
Meupeus keuyang kana pamapag tanggal.

SAJAK KARDJO WANGSAATMADJA

2009-03-04T03:37:00.000-08:00

ROH

Jungjunan ! Cimata, taya guna, cimata
Ngaguyur gunung
Gunung kuburan

Jungjunan ! Ceurik, taya hartina, ceurik
Mareuman laku
Seuneuna nafsu

Jungjunan ! Jiga kakapalan
Lalayaran
Teu manggih labuan
Mangtaun-taun

Jungjunan ! Jiga kakapalan
Tue kamudian
Lalayaran
Teu puguh jalan.

Tina Warga No. 3 Agustus 1957

Pilar Japati

Pasosore japati ngajajar na pilar
Kalangkangna ragrag ka lemah : lapar
Ah, kamerdikaan teh lain deui jungjunan
Mun hirup saukur nunggu pangawur

Pasosore kalangkang ngarandung wuyung
Jangjangna beurat rek hiber
Ngaruyung na pilar-pilar pamager
Jadi hirup piaraan

Japati kaleungitan langit
Peujitna pilar
Kabebasan, kasieun modar

Japati ngajajar na pilar
Nunggu pangawur
Lenggut nundutan, kajongjonan.

Katerangan :

Dilahirkeun tanggal 24 April 1937 di Garut. Lulus B.I Basa Perancis taun 1959 di Jakarta. Kungsi ngawulang basa Perancis di SMA Kanisius, Jakarta, SMA Negri Ciamis. Nuluykeun sakola ka Fakultas Sastra Jurusan basa jeung sastra Perancis di UNPAD Bandung.
Nulis Sajak jeung Carpon dina basa Sunda jeung Indonesia. Karangan-karanganana dimuat dina Gelanggang Siasat, Kiwari, Wanita.

Sajak Kusnadi (Edi) Prawirasumantri

2009-03-03T23:20:00.000-08:00

Sang Kuriang *)

I
Medal tengah leuweung luwang liwung
dipapag rampe jeung kembang
dianteur ku guruh curug
ditiir ku angin subuh

Sang Kuriang nyangkring getih
getih indung na jantungna
terah dewa swargaloka
Sang Kuriang mawa nafsu
napsu bapa na atina
rupa anjing sato hina

Cumeluk gunung ti tebeh kaler
Sang Kuriang anak setan
alungkeun ka caah walungan !
Gerona laut ti pakidulan
Sang Kuriang budak agung
geura gede geura jangkung !

II
Si Tumang perlaya ku leungeun anak
bongan dosa ka manusa
Dayang Sumbi wet kabobodo
nebus ucap sagawayah.

Sang kuriang ku indung ditundung
nya indit bareng jeung bulan
mungguh tutung pabeubeurang
mun peuting teu genah cicing

III
Kalunta-lunta ngubek buana
Sang Kuriang ayeuna mulang
ka lemah caina nya datang

Sang Kuriang puguh ge linglung
da leumpang teu eureun lempeng
majar deungeun nu puguh indung
anteb bogoh barang gok amprok

IV
Demi langit demi bumi
nu nyaksian kajadian
Sang Kuriang anak pituin
haram kuring kudu kawin !

Sang Kuring bedang demi sorga jeung naraka
demi sagala nu teu kadeuleu
Dayang Sumbi bagian kuring
sok abong henteu kacangking
najan sarat siga beurat
Citarum kudu dibendung

V
Sang Kuriang eleh geleng
puguh tipu majar pajar
Dayang Sumbi nu waspada
ngarasa atina lega
rek leupas tina cocoba

Wet lalaki tara kasor memeh wanci
pamohalan paneja henteu laksana

Dayang Sumbi jeung Sang Kuriang
pengkuh nu embung keukeuh nu hayang.

*)Keur ieu antologia dipigawe ku panyajakna (nu nyusun)

Sukabumi *)
(keur dida)

ketir nu hariring jero jantung padumukan
hirup jeung lastari balawiri tanpa ciri
ti jolongjong paninggaran ngarampa dada
ngusap mata ngembeng mili lantaran sasab.

duh lembur nu liwung nyanding wuyung
kawas hapa kateubeneran hirup kuring
nya pasrah pasrah ka saha, dida
kumelendang jalma diperih pati
poe rasa isuk jeung isuk

pagunungan nu simpe desa nu rehe
tapi kuring cinta ka manehna
mun girimis miripis di pipir kadenge
ragrag na congo ati pasosore
kuring deuk miang ngajugjug nu teu kateang

Tina kiwari No.6/7 Desember , 57/Januari 1958

*) Keur ieu antologia dipigawe mindo (revisi) ku panyajakna.

Dilahirkeun di Sukabumi tgl. 4 Pebruari 1934. Kungsi ngilu kulian tertulis Akademi Administrasi Daerah Swatantra ti Balai Kota Bandung. Kungsi digawe di N.V inport-eksport.
Mimiti resep tulas-tulis boh dina basa Sunda atawa Bah.Indonesia taun 1955. Kritik-kritikna dina basa Sunda kungsi dimuat di majalah Warga, Kiwari jst.

SAJAK-SAJAK KANG FAUZI

2009-03-03T02:46:00.000-08:00

DUNYA

Incu putu !!
regepkeun ku hidep
dunya geus kolot
awewe-lalaki ganti rupa !!

Incu Putu !!
nu ngaku nabi geus rea
pamingpin geus ngawisesa
laku jeung lampah patojaiah
ngan dunya jadi udagan

Incu putu !!
tempo jagat geus rarengat
gunung geus nyoara
tanda rek datang mangsa
moal lila kiamat !

Regepkeun ku hidep !!
ulah rek nurut ka nafsu
ulang ngaraja ka amarah
ku nafsu bakal kaduhung
ku amarah deukeut cilaka !

Geura sujud ka indung
geura hampura ka bapa
geura jeroan agama
mangsana bakal ka baca !

Majalaya, Juni 2008

NAPSU

Basa srengenge mimiti meletek
nafsu nyingraykeun ibun bajra
nu ngalimpudan eusi hate
ngawasa di alam dunya

Panonpoe geus manceran
hate masih nyarita
nafsu tetep ngawisesa
ngaduruwiksa !!

Ayeuna geus tunggang gunung
sadar kasalahan salaput sirah
tapakna natrat
Gusti, abdi banget ku kaduhung !!

Abdi pasrah sumalilah
bebendon ti Maha Suci
ka jalma nu gede dosa
mawa nafsu teu gumati

Bandung, juli 2008

Sajak Eddy D.Iskandar

2009-03-02T21:38:00.000-08:00

SUNDA ( keur Rahmat M Sas Karana)

Pancuran, pancuran kula
walungan, walungan kula
lautan-lautan kula

cikahuripan
awaking

Tanggal bagja tangkel tentrem
daun hirup daun hurip
sawah deudeuh sawah nyaah

sukma waluya
ngajega

Taneuh maneuh taneuh galeuh
jeg ajeg tohaga raga
dicangcang ku sora degung
ditenung ku sora degung
dielingan cianjuran

hung ahung
nganteng na jajantung

MASJID

digentraan sora adan
jul-jol nepungan
sujud ka pangkonan

teuing ku tentrem
manteng ka tangtungan
gumulung sarining wening
galindeng awqeuhan asih.

Sajak-sajak Wahyu Wibisana

2009-03-02T02:41:00.000-08:00

Panyusul

Kuma akalna sangkan hate jadi simpe
sagala kenangan supaya musna ?
ulah digoda ka bungahan nu geus tega
liwat jeung mere tapak dina rasa

Kuma akalna sangkan kalbu ulah ngalagu ?
sagala lalakon nu geus kasorang
ulah mere sora kana jiwa anu lara
sanajan di pikangen ge taya gunana

Ahm ayeuna datang mangsana
- duh awak
balitungan ceda jeung dosa
na marengan suka-seuri baheula

Pileuleuyan.... Pileuleuyan !
ieu lagu nu panganggeusan
ka luar tina sungut nu geus bau
jeung badan nu leuleus-lesu

Rek paeh teu dina pangkuan kakasih
mun di leuweung lodaya bagianana
di muara buaya buaya ancoanana
di laut lauk hiu nu geus nunggu
nyasaak awak nepi ka beak
meakeun riwayat nu henteu kebat
rumasa bongan sorangan

Pileuleuyan....Pileuleuyan !
ieu lagu nu panganggeusan.

Tina Warga No.149
tanggal 22 September 1955

Papancen

Bisa jadi aya nu nanya
ka kuring majarkeun tega
ngan sabenerna dina cinta
kana rasa

Upama aya nu datang bari narajang
kuring hayang ngajak sasalaman
sakalian pileuleuyan
ieu lalakon geus tamat
kuring rek kebat
liwat !

Ayadeui hiji popotongan
nu muntangan
bari nyaritakeun deui dongengna
jeung ngalangkang
dina lensa mata palsu
saru

Ah, naon gunana setan ?
ieu jaman terus leumpang

Hiji-hijina kahayang
nu ku kuring rek dibadanan
bisa jadi keur manehna
hiji-hijina pacaduan.

Tina Panghegar No 15 th.IV
9 Desember 1955

Pangbalikan

Iuh-iuh gunung kuring
angin ulin dina embun-embunan
sawaktu-waktu kuring kudu nepungan
dumeh hirup halabhab cinta
di maranehna nya ayana

Aya sababna kuring tibelat
aya sababna kuring pegat
tapi nu ahir lain kaabadian
kakasih dina hate ngawih deui

Iuh, iuh gunung kuring
nyata, nyata tanda tanda
ngabalungbung jalan hirup
nepi ka nyawa rek surup
ka maranehna kuring rek balik
ka maranehna kuring rek pamit

Ciawang, 28 -7-'56

Tina Warga no.193
tgl. 22 Agustus 1956

Carita nu sarua

Peuting nu kuring beurang nu kuring
ngagilisir kana ati nu geus diajar ngarti
lewang jeung ludeung
melang jeung tega
taya bedana ti kiwari

Bentang nu datang bentang nu indit
sampurasun jeung pa,it kana ati
nu geus diajak ngarti

Kakasih jeung satru
betah jeung susah
taya bedana ti kamari

Hareup jeung tukang
nu enggeus jeung nu rek datang
kabeh saperti sasari, nu beda ngan nu can aya
jeung anu perlu diajar ngarti

Tina Warga no.209
Tgl. 19 Januari 1957

WAHYU WIBISANA dilahirkeun di Cisayong wewengkon Tasikmalaya tgl.19 Januari 1935.
Kungsi jadi guru di sawatara S.R di Singaparna jeung Bogor. Sanggeus lulus KL PSGA nuluykeun sakola ka BI basa Sunda. Tuluy pindah ka Fakultas Kaguruan Ilmu Pendidikan juirusan basa jeung sastra Sunda Universitas Padjadjaran , Bandung, kalawan meunang tugas belajar di kantorna , Jawatan Kabudayaan Departemen P.D.K Jawa Barat.
Dina taun 1957 jadi redaktur majalah Mangle, taun 1958 rewdaktur Kalawarta LBSS.
Mimiti nulis taun 1954 dina Warga, Sipatahoenan, Mangle Kalawarta. SAKAPEUNG make sandi asma Oey Haw, Dewi Sukesih jrrd.

SAJAK ESON SUMARDI

2009-03-02T01:01:00.000-08:00

MUIH

Sora-sora jadi garing,
ngoleang kagedag gending
lain gending nyurup dangding,
gending aing jatining aing.

Rep sirep aing boga karep
muihkeun lamun tungtung pati
tis manitis di bumi tiis
nyukcruk asal balik asal.

Bandung, Oktober 1959
Tina Sipatahoenan No. 253 11 Nopember 1959

ANGIN PEUTING

Angin peuting nyungsi warti
lumpat kendor luar-leor
turun nanjak pul ampulan
nu kasampak ditoelan.

Angin peuting nyukcruk leuwi
mapay gawir nyorang pasir
ngoyag tangkal lenjang midang
nyipat tapak niir peuting.

Angin peuting ngaharewos
moro reuwas ka nu was-was
nyieun sieun nu teu ludeung
ngagebah nonjokan bayah

Angin peuting tigin jangji
lantaran bakti maranti
nembang kidung seuweu nagri
nganteur tibra urang sisi

Angin peuting nyirep diri
ngahudang sarwaning sari
sari pati ratu sari
megar hogar nyebar wangi

Angin peuting muru wanci
muru wates congo ati
paudag-udag jeung dulag
risi katangen balebat

Angin peuting ngiles pules
meuntas kota sewu desa
mekel kagandrung kapeurih
di leuwi digulung cai.

Bandung, Desember 1959
Sipatahoenan No. 292 , 30 Desember 1959

Katerangan :
Dilahirkeun di Lemahabang, Wadas, Krawang, tanggal 27 Nopember 1937.
Sajak-sajak jeung carponna dimuat dina Sipatahoenan.

Sajak Shinta Ayu Punianjung

2009-02-24T12:55:00.000-08:00

Talaga

Nu ngampar lebah bangbalikan peuting
Neuteup lengkah ku jamparing
Bongan pucuk huru geus kalangsu
Tapi ngebrak mayakpak
Anteng disimbutan angin
Poe ieu kadeudeuh teh tan kaundeur
Poe ieu curug nutuh bangbaluh
Enya, apan talaga nu herang ngahaeub ka beurangnakeun
Kabaca ku sarerea beungeut cai nu canembrang
Kasurti ku unggal ati Nu sasari mipit jangji
Ting buricak ting borelak teu kahalangan ku anggang
Rido tumamprak kana kersa-Na

Eunteung

Gupayna rasa dina tungtung imut
Nembrakeun nu aya dina jero dada Hese nyumputkeunana
Da puguh etalase nongerak kabaca ku nu ngaliwat
Digulak-gilek digular-gilir didungdak-dengdek,
Galeuh-galeuhna mah mo incah
Jati-jatina mah pageuh ngarenggenek
Mo bias tingaleun atawa miheulaan
Pan boga pancen maneuh

Katerangan : Shinta Ayu Punianjung pangarang entragan anyar.

SAJAK-SAJAK INO MISNO

2009-02-24T01:22:00.000-08:00

Arek Kamana ?

Urang kungsi
Dibawa kareta kancana dikadali kusir-kusir istana
Ninggalkeun istal demokrasi
Ngajugjug terminal tinggal "landas"
Tigurubas ka jungkrang tingal "landas"

Ayeuna,
Dina padati reformasi
Urang arek dibawa kamana ?

Sarakan Urang

Tina kasemahan deungeun
Jadi pahili angeun
Dayeuh dirajah
Semah jadi ngareunah

Dayeuh maneuh kadeudeuh
Sarakan urang
Digadabah
Jiga nu teuboga peurah
Lamun nu boga imah
Tepi ka kudu ingkah titirah

Mangkade,
Gancang geura nguniang
Ulah tibra sare
Bisi ku semah kapepende.

Deudeuh (I)

Hariring kawih haleuang tembang
Piraku kudu kurindang
Kasilih ku lagu deungeun
Kaleyek ku rock jeung disco

Jentreng kacapi tepak kendang
Lalayaran jeung kunang-kunang
Deudeuh
Moal boa
Bakal milu kabarerang

Deudeuh (2)

Kamana saung lisung
Nu sok rampak ngalagu kentrung
Tempatna nutu para ambu
Leuit nungtutan leungit
Nu dibuat leungiteun etem
Jigana lain ukur wadul
Mangsa jaga
Patani bakal cul pacul

Dewi Sri ngungun alum
Katanduk ku parabun jaman
Kalindih ku tehnologi
Deudeuh
Bulu taneuh remen ngageuri
Dina mangsa sagala ceuyah
Panyawah loba nu susah.

Katerangan : Tina salaka online.

------------------------------------------------------------------

DAFTAR NGARAN RAJA-RAJA

A. RAJA-RAJA SALAKANAGARA

1. Dewawarman I 130-168 M

2. Dewawarman II 168-195 M

3. Dewawarman III 195-238 M

4. Dewawarman IV (menantu A3) 238-251 M

5. Dewawarman V (menantu A4) 251-289 M

6. Dewawarman VI 289-308 M

7. Dewawarman VII 368-340 M

8. Dewawarman VIII(menantu A7) 340-362 M

B. RAJA-RAJA TARUMANAGARA

1. Jayasingawarman (menantu A8) 358-382 M

2. Darmayawarman 382-395 M

3. Purnawarman 395-434 M

4. Wisnuwarman 434-455 M

5. Indrawarman 455-515 M

6. Candrawarman 515-535 M

7. Suryawarman 535-561 M

8. Kertawarman 561-628 M

9. Sudawarman (adik B8) 628-639 M

10. Dewamurti 639-640 M

11. Nagajayawarman (menantu B10) 640-666 M

12. Linggawarman 666-669 M

C. RAJA-RAJA KENDAN (GALUH)

1. Manikmaya (menantu B7) 536-568 M

2. Suraliman Sakti 568-597 M

3. Kandiawan Dewaraja 597-612 M

4. Wretikandayun (GALUH) 612-702 M

5. Mandiminyak 702-709 M

6. Bratasenawa 709-716 M

7. Purbasora (kemenakan C5) 716-723-M

8. Sanjaya ( Putra C6) 723-732-M

9. Tamperan Barmawijaya 732-739-M

10. Manarah (Surotama cicit C7) -783-M

11. Manisri-(menantu-C-l0) 783-799-M

12. Tariwulan 799-806 M

13. Welengan 806-813 M

14. Linggabumi 813-852 M

D. RAJA-RAJA SUNDA

1. Tarusbawa (menantu B12) 669-723 M

2. Harisdarma (cucu D1=C8) 723-732 M

3. Tamperanbarmawijaya 732-739 M

4. Rakeanbanga 739-766 M

5. Rakean Medang Prabu Hulukujang 766-783 M

6. Prabu Gilingwesi (menantu D5) 783-795 M

7. Pucukbumi Darmeswara (menantu D6) 795-819 M

8. Rakean Wuwus Prabu Gajah Kulon 819-891 M

9. Prabu Darmaraksa (adik ipar D8) 891-895 M

10. Windusakti Prabu Dewageng 895-913 M

11. Rakean Kemuning Gading Prabu Pucukwesi 913-916 M

12. Rakean Jayagiri (menantu D11) 916-942 M

13. Atmayadarma Hariwangsa 942-954 M

14. Limbur Kancana (putra D11) 954-964 M

15. Munding Ganawirya 964-973 M

16. Rakean Wulung Gadung 973-989 M

17. Brajawisesa 989-1012 M

18. Dewa Sanghiyang 1012-1019 M

19. Sanghiyang Ageng 1019-1030 M

20. Sri Jayabupati (Detya Maharaja) 1030-1042 M

21. Darmaraja (sang mokteng Windura) 1042-1065 M

22. Langlangbumi (sang mokteng Kreta) 1065-1155 M

23. Rakean Jayagiri Prabu Menak Luhur 1155-1157 M

24. Darmakusuma (sang mokteng Winduraja) 1157-1175 M

25. Darmasiksa Prabu Sanghyang Wisnu 1175-1297 M

26. Ragasuci (sang mokteng Taman) 1297-1303 M

27. Citraganda (sang mokten Tanjung) 1303-1311 M

E. RAJA-RAJA KAWALI

1. Linggadewata(sang mokten Kikis) 1311-1333 M

2. Linggawisesa (menantu E1=s.m Kiding) 1333-1340 M

3. Ragamulya (aki kolot) 1340-1350 M

4. Linggabuana (sang mokteng Bubat) 1350-1357 M

5. Bunisora Suradipati (adik E4) 1357-1371 M

6. Niskala Wastu Kancana(s.m Nusalarang) 1382-1482 M

b. Ningrat Kancana (Dewa Niskala) di Galuh 1475-1482 M

F. RAJA-RAJA PAJAJARAN

1. Sri Baduga Maharaja 1482-1521 M

2. Surawisesa (Ratu Sangiang) 1521-1535 M

3. Ratu Dewatabuana 1532-1543 M

4. Ratu Sakti 1543-1551 M

5. Nila Kendra (Tohaan di Majaya) 1551-1567 M

6. Ragamulya Suryakancana 1567-1579 M

Sajak EDDI TARMIDDI

2009-02-23T21:00:00.000-08:00

Kiyai Mujur

di momogor gunung gundul di celah dengkeng

panenesan nanggung lodong dua tanjeur

peso sadap ngagurilap seukeut lir lalancippati

bulu bitis ngajejebris nyeuseup reumis

bulu dada tanpa tutup ngaliglag tanda digjaya

aki mujur

menak tedak pabuaran --kokojo sagalaherang

tulakpanto pasir gundul -- senapati legok cacaban

buuk digelung jucung dibeulit iket wulung

kumisna sereg di lawang

godeg pamarepeh pangkeng

panggimir rampog jeung bajo

matana seuneu puputan lir muncang jadi

aki mujur getih asli sagalaherang
babakan endah titinggal rantaikancana

putri panglamunan bujang

madeg ratu di hulu dayeuh beungeut kota

karatona di caringin cagaklima

di dada kajayaan

tamansari pamandian dijaga ku oray weling

ditungguan maung bunianjeung kerud kukul

diukna dina tunggul tangkal kiteja

nyerangkeun korawa balad undakan kalangansari

nu datang ti cikabayan

puseur dayeuh nagarapageuh

aki mujur lambang kadigjayan

tameng dada benteng nagara

gawena nyadap ngahuma

melak kapas mintal kanteh

ninun nganyam gawena si nini mujur

jeung nungguan peueut kolotdeuk dititis

aki mujur andekak sila maros gula

bonjoran sapagarangan harerang

mun geus loba diiangkeun ka kuningan

ditukeur jeung kancah, seeng jeung katel

bekel nyanghareupan hiruptengah leuweung

aki mujur nitis gula dicitak haurkuning

ngaguis tanpa sosodok - make kokod

mepes peueut lain muncang diprekprekan

tapi kalapa huluan diremekkeun dina tuur

aki mujur kadatangan semah galak

pinter menpo cikalong cimande

make ulin lagam pamonyet pamacan

awakna seseg jeung dedeg diiket barangbangsemplak

ki semah tetenjrak menta rajakaya

deuk diangkut dikunjal ka parigembor

aki mujur leleb nyarita siga teu ngewa

-- raja bangsat utusan menak parigermbor

andika teu perlu jeung sentak sengor

tembongkeun ka kula elmu jeung sihir

mun kula teter bawa rajakaya ka nagri kaler

turutan kula, obeng gula keur nyengka

susuguh kaula cai gogomplokan inum saharita

bangsat herot bajingan paksi

ngarumpuyuk sujud hareupeun aki

aki mujur unggul tetep tandang

tug kiwari ngaran pasir di cibengang

pasir mujur kamashur

uruk ngababakan menak sagalaherang

kaceluk unggul kawentar gagah

seuweu ratu rantaikancana terah taruna.

dirangki di Jogya waktu kula inget ka lembur -- 7 sapar 1377

Tina Kiwari no.4-5-6 , September, Oktober, Nopember 1955

Katerangan :

Dilahirkeun di Sagalaherang, Ciamis taun 1935. Nuluykeun sakola ka Fak.Hukum Gajah Mada terus pindah ka Univ.Pajajaran Bandung.

Sajak-sajak jeung carpon-carponna dimuat dina majalah-majalah/suratkabar : Panghegar, Warga, Kiwari, Kalawarta LBSS,Kujang, Sipatahoenan.

Ilubiung dina lapangan senilukis, senidrama, senitari, gamelan, reog. Ayeuna nyekel kalungguhan panitera Lembaga Basa Jeung Sastra Sunda (timimiti taun 1958); Sesepuh pakumpulan Seni Sunda Wirahma Rantai Kancana ; suntradara D.H & K DAD TT III jeung anggota nu ngadegkeun studiklub Teater Bandung.

Sajak Inu Nugraha

2009-02-23T08:19:00.000-08:00

ASMARANDANA

Asa cikeneh anjeun ngaharewos

Nyulusup na sapanjang renghap napas

Marengan gelikna suling

Lir ngahudang deui sara asih

Nu geus lawas

Laas ku mangsa

Kari waasna

Ngalangkang

Siga cahaya bulan

Nu ngambang di langit paul

Duh,

Getih nu geus lila ngadagleg

NGagulidag lir lambak tujuh sagara

Mawa Jumeritna sora hate

Iraha pinanggih jeung kaasih nu wening

Tanpa jungkrang jeung hahalang

Nu misahkeun urang ?

Asa cikeneh anjeun ngaharewos

Lir gelap nu ngabentar

Mupus tapak lengkah nu mimiti natrat

Na lemah beueus ku cimata kahanjakal

Naha bet nyulam kahayang

Nu ngan saukur wangwangan ?

ASMARANDANA (2)

Enung,

Basa matapoe moncorong ka sorenakeun

Basa cahayana ampir suda

Basa galindeng kacapi nu ngajentreng

Marengan renghap napas jeung teuteup

Nu eunteup na pucuk asih

Anjeun nembangkeun deui kidung asmarandana

Malikan lalakon nu geus lawas

Kumaha lewangna anjeun ngudag lamunan

Bari mulungan bentang nu maruragan

Na lemah nu beueus ku cisoca anjeun

Duh enung,

Jentreng kacapi na tungtung ramo anjeun

Lir gelap ngabentar. Neumbrag hate

Nu disamunikeun na lelembutan

Lasawang, lengkah anjeun mapay-mapay jalan satapak

Nyiar pamuntangan na tungtung kahayang

Nu tacan natrat

Kiwari

Urang bareng ngudag jaga

Bari nyulam harepan. Sugan jeung sugan

Gelikna kacapi

Nepi ka lawang kabagjaan

Nu masih dina wangwanan

Najan renghap karasa eungap

Lengkah geus rumanggieung

Teuteup kari sakiceup-sakiceup

Aya kahayang

Ramo-ramo nu geus ngeeper

Ngageterkeun deui rasa asih

Urang bareng mulungan bentang nu kungsi maruragan

Sugan pareng, urang awurkeun deui ka langit paul

Langit kaasih tanpa wates

ASMARANDANA (3)

Na soca anjeun

Aya talaga anu liuh

Caina lir runtuyan mutiara

Ririakan katojo matapoe

Na soca anjeun

Aya cahaya ngaburisat

Lir gugupay

Ngajak neuleuman talaga

Ngan

Iraha tepi kana dasarna ?

Di dinya, langit anu biru

Nampeu

Teu kaalingan mega

Ngajak ngawang-ngawang

Ka langit tanpa wates

Mawa hate nu pinuh rasa cangcaya.

ASMARANDANA (4)

Angin peuting ngahiliwir

Marengan lengkah

Mawa hate rajet

Tapak natrat

Sapanjang lemah nu rarekah

Katojo matapoe katiga

Bulan anu moncorong

Ngambang di awang-awan

Cahayana lir nyulusup kana sakujur balung

Geuning aya keneh galindeng wirahma asih

Bareng jeung sorot soca anjeun, jungjunan

Ting kumelip, kawas bentang anu baranang

Marengan renghap anu eungap

Nyorang lalampahan nu kari jeujeungkalan.

Dimuat dina Salaka Online

Katerangan :

Pangarang Rumaja entragan anyar. Dilahirkeun di Ciwidey, putra ka dua Bp.Asep Idjuddin. Beres kuliah, manehna digawe di Aceh. Tapi kaluar deui. Ayeuna keur ngalamar ka sababaraha parusahaan di Jakarta

Sajak-sajak Adhitya Dwipayana Raspati

2009-02-23T02:11:00.000-08:00

D0’A

Gusti, Diri nu lumaku lunta ti sarakan baligeusan
Neukteuk paneuteup kadeudeuh
Ngaprak lebah talaga kahayang
Mipir-mipir sisi batin, nyaliksik bangbalik pikir
Nu nongerak tembong-gelor semu halabhab paneang
Bongan kalangkang ngangkang lebah dasar lawang
Padahal.
Cikaracak salin jinis ngagulidag, bangun migunung kapahung
Da cenah boga cekeleun,
Da cenah leubeut pameungkeut nu migeugeut leugeut-teureup

Gusti,
Abdi ngalengkah nyangga amanah
Muga teu kapacikeuh geugeuleuh Suku nu tatu seja satuhu, dampal nu raca mo ngarasula
Mung, naha bandera tacan ngelebet?
Naha lagu pucung bet sinangling maskumambang?
Apan raga molah beurang, nyumput ‘na siduru isuk
Nu ngahodhod tungtung ibun
Megat balebat nu lawas ngingkilaban.

Gusti,
Sapuluh ramo disusun, dientep ku lafad bengras
Nu ngagelar lebah caang, nu nguriling birit peuting
Ngajoprak lebah panyadrah, sumerah kana papasten
Binarung cahaya murba, kalimatutoyyibah
Ngalimpudan asta-garba jero dada.

PANTO DORA

Tina lacak nu ngagurat
Aya carita nu ngembat, teu kahalangan ku sugan
Aya gambar nu atra
Ngajanggelek dina tangtungan kamari
Neundeun tineung, tukangeun kamelang
Cepet-lempeng muru kaca-kaca muka
Ngeblak pangjurung duhung nu can kungsi ngareret godeg
Basa tungtung jalan ngicup kareumpeukan jukut-riut
Aya balandongan kosong taya pangiring igel-babancong
Ngan lawang nu kapasini nu ngundakkeun sesengkedan: La Ilaha Ilalloh,
Panto dora muka kabebasan lenglang.

LAUT

Nu ngalamuk dina pucuk letah bodas
Nyangga pancen jeung panastren
Jongjon nyampeurkeun pangggoler pangkek
Taya salambar kalakay nu teu kalanglang
Najan kararas ngulapes garing, pangusap mah anteng dina pancer pamadegan
Guruh galura mibaju
Dina wirahma nu geus miwanoh
Taya kecap reureuh-cape, taya kulisik-busik sumingki
Mun waktu milu mahayu, penyu jeung lauk muru kalintu
Mutiara ngabarak ‘na jajalaneun
Jeung seor angin ngageberan, milu mancen makalangan
Taya risi-taya gimir
Da aksara nu ngayuga, balaka lebah pangraksa

TANGTUNGAN

Nu datang geus nepi kana umpakan
Nu pandeuri ngeureuyeuh nikreuh di landeuh
Nincak amparan jajaten
Teu kaheumpikan kakeueung, teu kaeunteungan paneumbleuh
Seseleket,
Lebah lolongkrang ranggeuyan bentang
Bongan langit ngabangingik
Nepakeun sasaak ka jagat
Na saha nu teu maraca, apan nembrak lebah tarang
Panceg dina tatapakan perang
Nguriling sakujur awak, ngancik lebah dua panon: Kullujasad Lempeng mayeng teu galideur.

PANCEG

(Haturan Mamah & Bapa di Tatar Parahyangan-Ciwidey)
Lengkah ngajaul mabal tina pipir batin
Neuleuman pangreureuhan galeuh-maneuh
Nagara ancik-ancikan nu ngablag lega satungtung langit
Teu nangtukeun lebah mana palabuan
Teu nanyakeun jalan mulang
Teu matak galideur jantung
Pan angin mawa tangara dina harewos ti kalangengan
Di mana oge tanah janah, tincakeun, aprakeun, teangeun
Raga darma wawayangan
Milu laku kana tuhu, teu kudu nyawang mangsa, teu kudu inggis ku pati
Da boga adeg-adeg cecekelan
Basa dina tungtung letah, kasipuh aweuhan rosul
Reka permana, sumanding tanggungjawab
Bongan kahayang tan kasawang ‘na kalangkang
Bongan diri nyamuni lebah bilik paniisan
Kadeudeuh,kacinta,katresna,mucunghul binarung wuyung
Apan talaga nu urang, apan letah- jagat sumarambah
Awor dina kaagungan Sunda nu ngagupay luhur gunung
Jeung kembang nu ngahaleuang
Nyaangan tutungkusan malati jeroning ati
Kabeh kaliung-kasiput ku geter
Allohhu akbar.

Gorontalo, medio Juni 2008

Katerangan : Pangarang entragan anyar

SAJAK K.S.Widjaja

2009-02-20T07:24:00.000-08:00

Keur nu indit ti heula

Kamar heureut
Hate raheut
Hiji-hijina lampu maturan nyileuk

Pikir balik ka lagu lawas
Hariring biwir nambah ceurik
Bener urang kungsi aya

Nyieun carita nu pegat ku cinta

Tapi....
Napas embung pegat dina kapoekan ieu
Jeung rasa nu teu paeh ku ngubur maneh
Tetep anjeun nenjo keur inditna

Kamar heureut
Hate raheut

Anjeun indit ninggalkeun kaludeung.

Tina Warga no.209
tanggal 19 Januari 1957

Carita di sisi ombak

Pangbalikan carita na peuting harita
Lampu kapal ngiceup di tengah laut
Mata bebene ngiceup dina keukeupan
Kuring kacangcang ku dua kahayang

Cicing, cicing, kapal indit
Bebene meredih ngajak balik
Kuring ceurik ku dua kahayang

Na peuting eta keneh
Hawar-hawar sora nembang
Kuring ceurik ku dua kahayang

Na peuting eta keneh
Hawar-hawar sora nu nembang
Lagu kaunggulan
Tapi

Kapal indit
Bebende balik
Kuring pegat di dua kahayang

Semarang, Januari 1957
tacan diumumkeun.

Katerangan :

Ngaran lengkepna Koerdi Soekandawidjaja, dilahirkeun di Kuningan tanggal 6 Mei 1934.
Kungsi milu kursus B.I Ilmu pesawat di Semarang bari ngawulang di sawatara S.M.P jeung S>M>A Semarang. Jadi o sapatu bata di Sukaumi. Ilubiung dina lapangan organisasi Sunda, boh di Bogor atawa di Semarang. Kungsi jadi redaktur Vunus jeung Projektor (Cirebon), Sora Putra Sunda ( Bogor) jeung Sora Pajajaran ( Semarang).
Karanganana dimuat dina Kiwari, Warga,Sora Pajajaran, Venus , Projector jeung via RRI Cirebon mangrupa carpon.

SAJAK-SAJAK DJALALUDIN RUMI

2009-02-02T07:23:00.000-08:00

HURUNGNA CINTA

“Dengekeun suling nu ngageuri,

Salawasna ngagelik, saprak didudut

Tina kebon nu pinuh jukut, hiji aleuan

Nyeri jeung cinta nu hurung

Lagu kuring, beuki eces,

Taya saurang nu ngadenge.

Emh, bagja temen mun sobat ngarti isyarat

Tur ngadumaniskeun jiwana jeung jiwa kuring

Tah ieu hurungna cinta nu ngaduruk,

Ieu anggur cinta nu nimbulkeun gairah

Naha daek anjeun ngadengekeun kumaha raheutna hate,

Dengekeun, dengekeun, sora ieu suling.

TAH KITU URANG

Manusa nyuguhkeun alesan (najan manehna bohong)

Yen kalangkang teh euweuh

Aya nu ngomong urang teh tangkal

Nu sejen nyebut urang teh jukut

Najan ngulisikna dangdaunan

Bukti yen angin keur ngahiliwir

Tuluy sepi, malah combrek

Tah kitu urang jeung nya ieu urang.

TEU BURUNG BEUNANG

Kuring neangan jiwa di jaladri

Ngan manggih batu karang

Handapeun budah,

Tembong mayakpakna samudera

Dina poekna hate,

Sapanjang lulurung heurin,

Rumpu-rampa; nya ieu! Cahya teh,

Deudeuh nagri nu jadi piunggul.

LALAMPAHAN

Bagja temen,

Ngancik dina salaka hate;

Nu mecut gelebugna kahirupan,

Lir ombak tibeubeut, kuring nyoledat.

Rasiah laut

Diungkab bari ngageleger

Lir mega leuleus di basisir

Kuring tibra.

DUNYA NU DIBUNGKUS

Dunya nu nyumput dibulen mega jeung hujan,

Nu rupa-rupa…

Katembong ngan ku maranehna nu hatena bodas,

Teu katipu dunya biasa jiga sampurna.

(lajengkeuneun; tina peperenian asep idjuddin)

SAJAK SAYUDI II

2009-01-25T19:25:00.000-08:00

Neangan
Keur Aka di Sundakalapa

Rajah :
Baeu mojang geura midang
anu mayung dina layung
tempat utun nundung wuyung
ngumbar ku kanyaah rasa

Mangsa :
Pecat sawed bati ewed
tengah dahi ngan hanjelu
lumampah marengan lengkah
tinggal ngahalimun gunung
napak talaga cimata
nyungsi dipukpruk kanyeri

Lieuk leuweung lieuk lamping
tiis jempling tengah peuting
taya rorongkeng ngaronggeng
sepi jangkrik nu ngarenghik
ngan batin nu melas-melis
lalakon hirup nunggelis

Pasini :
Tapi kula henteu suda
ti ayeuna meungpeung duda
neangan bebene hate
mo’ humandeuar kuk kadar
teu rek lumpat ku nu ngupat
teu rek ngejat ku supata

Kajeun tungkul nunjang ngidul
sorangan nandang wiwirang
ngocor getih jeung kapeurih
batan teu patepung lawung
jeung panundung nu Liwung
pangeusi diri nu hirup

Suku kidul Tangkubanparahu : 7-4-‘55
Tina Panghegar No.59 tgl. 22 April 1955

Pangbalikan

Taneuh beureum panonoban cihcir peuting
solasih anu ngajaring
parentul tunggul kabingung
pangbalikan tempat anggang
hateupna kuwung-kuwung paying paul
simbutna halimun gunung
dunya dunyana
lampuna gantung kasawang sajagat
rupana ngelebet hideung
kuring-kuring anjeun-anjeun

taneuh beureum panonoban cihcir peuting
solasih anu ngajaring
parental tunggul ka bingung
lalakon nu rek dating teu kateang

Tina Warga No.133 tgl.22 Oktober 1955

Longser
Keur : Aka di Delhi

Lung ! Lung ! Lung !

Gembrung gamelan surak eak-=eakan
randa dangdang ngembang gula
bujang neangan sampeuran

Ronggeng denger nangtang lawan
igel-igel tanpa wirahma
imut-imut pangirutan

Lung ! Lung ! Lung !

Gamelan manjing kasukan
dilingkung ku kembang jalan
kalangenan kalanggengan
dihibaran beureum obor
dina menit hujang duit
bias poho kupanenjo.

Kota sangkuriang , Februari 1956
Tina Warga no.167 , 5 februari 1956

Katumbiri

Katumbiri ngukir langit
titihan putrid panyari
turun mandi leuwi hiang
pangbibita urang huma
pangbebenjo a budak angon
sampeureun mangsa rek dating

Katumbiri panyilo diri
Sari langit taya bukti
Ngaraja katuna raja
Pananggeuhan dunya maya

Katumbiri dina ati
Tuduh luhung kasakti diri
Mangsa samagaha rasa
Pangruat : mangka tanggah kana mega
Jeung tungkul ka tapak suku.

Kota sangkuriang Maret ‘56
Tina Warga No.173 tgl. 22 Maret 1956

Indung jeung Anak

Anak :
Ema naon eusi langit
Jeung di mana tungtung langit
Katut bentang nu baranang

Indung :
Teu jauh ti dada ema
Eusina nafas jeung getih
Bentang teu jauh ti ujang

Anak :
Ema saha nu boga langit
Jeung bentang anu baranang
Saha nu boga bulan
Katut beurang jeung peutingna

Indung :
Kapan sagana nu ujang
Paeh hirup anu ujang.

Kota sangkuriang, Juni 1956 , Tina Warga

Onih

Onih bulu taneuh urang dayeuh
Keur leutik mongmongan ema
Hirupna nyampak di bapa
Ceurik ukur ku pamenta
Teu nyaho di wujud dunya.

Geus gede tenjona jodo
Dirangkul lamunan endah
Ngapak ngapung moro jauh
Tinggal kalangkal ngajangkang

Kamari Onih patali janji
Ka ponggawa ngabuhaya
Dasar Onih sisit kadal
Geus nahun contana gagal
Hareneg didada teu suda

Ayeuna Onih rumaja kota
Awakna montok cintana hapa
Kelet pamelet udagan duda
Seuri Onih seuri duit
Hirupna di dunya tanpa cimata.

Kota sangkuriang , Juni ‘56
Tina Warga No. 185

Langit Ceudeum

Langit ceudeum
Hate hieum

Hiliwir angin berewit
Angin tuhur nutup kujur
Mawa carita naraka
Bubuara nyedek dada

Hiji-hiji jaruji jandela muka
Jalan kunang-kunang
Ngaplak daratan tarahal
Digurat kudrat tangara durma

Langit ceudeum
Hate hieum
Saha nu tandang meunang
Saha nu tungkul remuk.

Kota Sangkuriang, 20 Jasnuari 1957
Tina Warga no. 210, tgl.25 Januari 1057

Hujan
Nyumponan pamenta Ayip

Tiisna hujan sepina jalan jamika
Bulan kaleungitan rupa
Peuting kaleungitan pesta
Kacapi ge teu bias ngungkulan kiricikna kamalir
Kawih mojang kawih sumbang

Raat hujan raat hujan
Meungpeung peuting tacan balik
Ka ‘saha menta bebela
Hiap bujang hiap bujang
Meungpeung samping tacan busik
Raga saha nu mibanda

Tiisna diri sepina taya birahi
Hujan nu jadi lantaran
Peuting kaleungitan lalaki

Kota Sangkuriang , Juni 1959
Tina Sipatahoenan no.207 th. XXXVII, 17 Sep’ 1959

Cinta
Keur Kos & Y.Suhaya

Cinta the lagu pangidungan manusa
Nu mere rupa laku dirina
Nya manehna nu ngayuga sagala

Dating mangsa bulan rumaja
Menta panande tina hate
Pona sungkan nyorang peuting
Seungitna tanjung seungit sausum

Mun umur lantis ku taun
Cinta mah banda nu teu suda ku katiga
Anu hurung dina tangtung
Mandiri ti bali geusan ngajadi
Lemah padumukan indung

Mun lembur diranjah batur
Cinta anu nepak dada
Poma sungkan mesat pedang
Da manehna nu ngayuga ieu dunya.

Kota Sanmgkuriang, 5-10-‘59
Tina Sipatahoenan no.230 th.XXVII, tgl. 15 Oktober 1959.

Katerangan ngeunaan Sayudi, tiasa ditingal di kaca sanes dina sajak : SAYUDI

SAJAK BASTAMAN

2009-01-25T07:01:00.000-08:00

Taptu

Keur Serdadu (baca Prajurit) :

Asa panghudang katineung,
mawa ketir kana pikir,
inget ka nu geus perlaya,
kasambut di medan jurit,
tinggal tutunggul ngajentul,
ganti raga nu geus taya,
teu puguh bugang bangkena,
teu dumuk tulang talengna.

Ceuk nu di tinggal :

Raheut hate kanceuh deui,
nalangsa kasuat-suat,
peurih asa digerihan, mun nyawang nu geus kasorang,
lain ku aral sabuha,
atawa manghanjakalkeun,
sina indit milu tarung.

...................... lain eta ..................
teu weleh ku deungdeuleueun,
keurna miang panungtungan,
teuneung ludeung haram-sungkan,
najan terang mapag pati,
teu gedag bulu salambar
cekel sabuk milang tatu,
da yakin baktina suci.

Carek di Yatim :

Teu rek nagih, moal menta,
da lain rek ngahutangkeun,
iklas teu jadi carita,
suka teu jadi bubuka,
enggoning nyusurup lagu,
garapeun pikahareupeun,
dapon ulah nyapirakeun,
kana pangorbananana.

................kiwari...................

hancaeun teu kakurangan,
ngan kari prak jeung daekna,
ulah ngan ukur carita,
ngupahan ku janji kosong,
tamba euweuh teuing basa,
panarima ka nu bela,
ditebus polah sarakah.

Meureun ceuk arwah teh :

Deudeuh teuing, utun inji,
bet teu nyana.........................

Tina Sunda no. 16 taun 1
10 Oktober 1952.

Katerangan :
Ngaran lengkepna Sjafei Bastaman. Dilahirkeun di Padaherang, Ciamis, tanggal 11 April 1928.
Waktu repolusi ngagabungkeun maneh ka tentara. Milu hijrah ka Jogya bareng jeung Corps Pelajar Siliwangi (C.P.S). Asup ka Jakarta taun 1950, di Komunikasi Pos, ngayakeun hubungan jeung para pelajar anu asup ka kota. Dina bulan Juli 1959 kaluar ti katentaraan. Terus usaha partikulir.
Sajak jeung carpon-carponna dimuat dina majalah-majalah Sunda jeung Panghegar.

DIPATI UKUR
(Tina Salaka Online)

Di Bandung aya ngaran jalan Dipati Ukur, nu can kapanggih di kota-kota sejen di Tatar Sunda, boa ngan hiji-hijina sadunya. Saha atuh Dipati Ukur teh? Bureng bin poek, matak ngahudang kapanasaran. Inget-inget poho, keur kuring di SD kelas 4 (1959), kungsi pun biang ngadongeng Rd. Dipati Ukur, cenah makamna di Kabuyutan, deukeut sasak kareta api, antara Soreang-Ciwidey. Nincak ka kelas 6 (1961), kuring kungsi maca buku kandel “Carita Dipati Ukur”, nu ngagoler dina meja tulis di kamar pun bapa. Les we poho deui. Ka behdieunakeun, basa kuring jadi wartawan majalah PIP Jakarta. Kungsi ngadenge dongeng Dipati Ukur, ti Pa Letkol (purn) RH Lily Sumantri (Bupati Bandung manten), cenah Dipati Ukur teh perang jeung Mataram, katewak di gunung Rakutak (tempat katewakna pamingpin DI/TII, Kartosuwiryo, 1962) deukeut Pangalengan. Makamna di Baleendah, da cenah Baleendah (Pabuntelan?) teh urut puseurdayeuh kabupaten Bandung, wewengkon Dayeuhkolot.

Ngadenge deui dongeng Pa Atja,suargi, memeh kuliah di rohang K Fasa-Unpad, 1979. Akur jeung dongeng Kang Saleh Danasasmita, suargi, di rohang redaksi Mangle, 1980. Cenah Dipati Ukur teh, bentrok jeung Mataram, katewak di gunung Lumbung, deukeut Pangalengan, dibabandan ka Mataram (Jogja), ditunggel jangga di alun-alun Mataram. Tangtu dikuburna ge di Mataram. Kungsi ngadenge dongeng Pa Endan Wirasasmita, suargi, di bumi Pa Yuyun Wirasasmita (Rektor Unpad manten), di Setrasari, cenah Dipati Ukur teh jenengan aslina Wongsonoto, salahsaurang panglima Mataram, nu nikah ka Nyi Gedeng Ukur (dalem Bandung) dina raraga eksvansi. Lieur. Tapi beuki kataji, sabab karasa aya nu disumputkeun. Nyaritakeun figure pamingpin Sunda, nu luhur elmu gede wawanen limpas pangabisa, punjul lingga papak, tangoh nyekel bebeneran lir karang curi laut kidul, nu sayaga dibabad galura, bet disimbutan.

Ka dieunakeun, maca desertasi Edi S. Ekadjati, suargi, “Carita Dipati Ukur Karya Sastra Sejarah Sunda” (1979), desertasi Emuch Herman Sumantri “Sejarah Sukapura, Sebuah Telaah Filologis” (1979). “Nagara Kerta Bumi I.5” (Disebut naskah Pangeran Wangsakerta(1980) hasil panalungtikan Pa Atja, Kang Saleh Danasasmita, jeung Kang Ayatrohaedi (tiluanana parantos tilar dunya). Pareng ka pabukon Geologi Bandung taun 1981, manggih TBG (Tijdscrhift Voor Indische Taal-land-en Volkenkunde. Uit Gegeven door het koninlijk Bataviaasch Genootchap Van Kunsten en Wetenschappen), aya pedaran tina catetan VOC ngeunaan Dipati Ukur. Taun 2002 manggih buku ipis”Mengenal Dalem Kawasen”, tulisan Drs. Djenal Abidin (2001), nembrakeun naon sababna Dipati Ukur ngabaruntak ka Mataram.

Kakara rada lengkep tah kaweruh ngeunaan Dipati Ukur teh, tapi angger can buled, masih loba keneh kapanasaran, ngan kaharti naon sababna kolot-kolot nyaritakeun Dipati Ukur teu sageplakna (kawasna sieun ku kalangkang Sultan Agung di puseurdayeuh nagara?). Alusna sajarah mah ulah disumput-sumput, keun we da peristiwana dipandang kalawan rasional tur dewasa,bari sadar kana ugeran NKRI.

Sumebarna Islam jeung Pangaruh Mataram ka Tatar Sunda

Karajaan Galuh, nu diadegkeun taun 612 ku Wretikandayun, dina auban karajaan Tarumanagara , tahun 1528 ditalukkeun ku karajaan Islam Cirebon. Samemehna, kira taun 1524, datang Fadhilah Khan (letah Portugis nyebutna Faletehan) ka Cirebon. Inyana putra sultan Huda ti Samudra Pasai. Sabada diangkat jadi panglima prajurit Demak, ku sultan Trenggono, Faletehan dibere pancen nyebarkeun Islam di wewengkon Pajajaran, mantuan Syarief Hidayatullah. Cirebon.

Gabungan prajurit Demak,Cirebon, bisa ngawasa Banten dina taun 1526. Nyakitu deui Sundakalapa, palabuan Pajajaran dikawasa dina taun 1527.Karajaan Hindu Talaga, ditalukkeun taun 1529, pamanggul juritna (panglima Islam)Pangeran Walangsungsang (putra Prabu Siliwangi ti Nyi Subanglarang). Malah puseur dayeuh karajaan Sunda di Pakuan, runtag taun 1579 ku gabungan prajurit Demak, Cirebon jeung Banten (Sabada Prabu Siliwangi pupus/tilem, taun 1521 M.). Tah ku bisa hasilna nalukkeun sababaraha karajaan, nepi ka arasup Islam, bray we muka, lawang pikeun Mataram ngawasa Tatar Sunda.

Tanggal 30 Mei 1619, VOC datang ngalindih Jakarta. VOC nu mangrupa kongsi dagang, kacida pisan gancang majuna, campur sarakah, nepi ka sababaraha wewengkon Mataram di Sunda, dijieun wewengkon monopoli. Tangtu we ieu perkara teh mendet tataniaga Mataram. Sultan Agung nu keur ngawasa (1613-1645), ngarasa dirugikeun ku polah VOC. Nya dina taun 1628 Mataram ngajorag VOC di Batavia. Gagal.

Dipati Ukur Ngabaruntak

Tanggal 12 Juli 1628, datang utusan Mataram ka Timbanganten (Tatar Ukur). Mawa surat tugas ti Sultan Agung, sangkan Adipati Wangsanata disebut oge Wangsataruna alias Dipati Ukur, mingpin pasukan (panglima) nu kudu ngajorag VOC di Batavia. Bulan Oktober katompernakeun taun 1628, Pasukan Sunda miang ka medan perang. Aya perjangjian, yen pasukan Sunda kudu ngadagoan pasukan Jawa di Karawang. Kulantaran geus saminggu pasukan Jawa teu embol-embol, Dipati Ukur hariwang bisi pasukan Jawa lila keneh datangna. Pasukan Jawa dianggap jalir jangji udar tina subaya.Kumaha mun saminggu deui pasukan Jawa teu datang, tangtu bakal mangaruhan kana sumanget tempur prajurit Sunda, di sagigireun bekel (logistik) kaburu ngipisan.Nya mutuskeun yen pasukan Sunda indit tiheula ka Batavia, ngagempur VOC, bari ngadagoan pasukan Jawa. Kakara dua poe pasukan Sunda ngagempur VOC, pasukan Jawa datang ka Karawang. Nempo pasukan Sunda euweuh, Bahureksa kasigeung asa teu dihargaan. Nimbulkeun gesekan nepika patelak antara pasukan Sunda jeung Jawa. Padahal harita pasukan Sunda keur unggul perang ngalawan VOC. Pasukan Sunda jadi nyanghareupan dua lawan, nya eta pasukan VOC jeung pasukan Jawa. Keur paciweuh kitu, ti dayeuh ukur, aya nu datang, mawa surat ti Enden Saribanon (istri Dipati Ukur). Yen mojang-mojang rahayat, istri-istri para panganggung, malah dirina oge digadabah ku panglima utusan Mataram sabaladna, nu nepika poe eta (sabada nganteurkeun surat ti Sultan Agung) can marulang ka Jawa, alesanana istirahat heula. Katerangan liana datang ti nu mawa iber, yen lain ukur mojang jeung para istri, tapi harta banda rahayat jeung pangangung tatar Ukur, dirampas. Taya nu wani ngalawan ka para utusan Mataram teh, sabab keur nyekel pancen penting ti Sultan Agung. Musibah gede.

Ku dua perkara eta (patelak jeung Bahureksa, jeung musibah di kabupaten akibat kalakuan para utusan Mataram), Dipati Ukur sabaladna mulang ka Pabuntelan (puseurdayeuh Tatar Ukur, di wewengkon Baleendah-Dayeuhkolot, ayeuna). Dipati Ukur nu bendu ngagugudug, ngarasa dihina ku utusan Mataram, sadatangna ka Pabuntelan. Langsung mere hukuman pati ka para utusan Mataram nu milampah nirca. Aya saurang nu ngalolos.

Geus kasawang, laporan nu nepi ka Sultan Agung, boh ti Bahureksa, atawa ti utusan nu lolos tina hukuman Dipati Ukur, pasti ngagogoreng jeung nyalahkeun Dipati Ukur.

Dina Nagara Kerta Bumi, disebutkeun yen salahsahiji watek (karakter) Sultan Agung, mun mere pancen ka bawahan, eta pancen teu meunang gagal. Mun gagal, resikona pasti di hukum pati. Bahureksa panglima Mataram,boga kasempetan pikeun ngabeladiri,nepakeun jurig pateuh, sagala kasalahan nu ngakibatkeun gagalna pertempuran ngalawan VOC, diteumbleuhkeun ka Dipati Ukur. Jadi Bahureksa salamet tina hukuman.

Ku mundurna Dipati Ukur, jadi karugian gede keur Mataram, sabab;

Leungitna kakuatan pasukan,
Taya ahli siasat perang (Abidin,2001:30)

Sultan Agung nyahoeun Dipati Ukur ahli stretegi perang,buktina tanpa pasukan Jawa, Pasukan Sunda meh bisa ngelehkeun VOC. Pasukan Sunda mundur teh, ngakibatkeun gagalna Mataram ngarebut Batavia. Sultan Agung nganggap Dipati Ukur jadi sabab elehna Mataram ku VOC. Matak Dipati Ukur dicap baha, ngabaruntak ka Mataram. Jadi kudu dihukum, mun perlu kudu dihukum pati.

Dina kaayaan kitu, Dipati Ukur sadar, yen inyana kudu nyanghareupan Mataram. Nya sakur bupati bawahanana (Dipati Ukur panglima perang), kayaning bupati Karawang, Ciasem, Sagalaherang Taraju, Sumedang, Pamanukan,Limbangan, Malangbong, Batulayang, Medangsasigar, Jaba ti bupati aya sababaraha umbul nu diajak: Ki Mananggel umbul Cianjur, Ujang Sara umbul Indihiang, Demang (Camat) Sawunggata,jeung Ngabehi Yudakerta ti Taraju, diajak ngabebaskeun diri ti Mataram, jadi kabupaten nu mandiri. Eta ajakan nimbulkeun pro jeung kontra. Nu teu satuju kana maksud Dipati Ukur, di antarana; Ki Somahita ti Sindangkasih, Ujang Sara ti Indihiang, Ki Astamanggala ti Cihaurbeuti, jeung Ki Wirawangsa ti Sukakerta. Kapikir ku Dipati Ukur, jaba ti nyanghareupan Mataram teh, kudu nyangharepan papada urang Sunda. Ahirna Sultan Agung mere pancen ka Cirebon, jeung kabupaten/umbul nu teu satujueun ka Dipati Ukur, sangkan newak Dipati Ukur, dipingpin ku Tumenggung Narapaksa ti Mataram. Sabada rempugan, saurang ge taya nu sanggup nyanghareupan Dipati Ukur teh, nya menta tulung ka Bagus Sutapura, hiji nonoman nu luhur elmu tur gede wawanen, putra bupati Kawasen, wewengkon Galuh.

Sanggeus Dipati Ukur kabandan, dibawa ka Cirebon, ti dinya dijogrogkeunkeun ka Mataram. Dihukum pati di alun-alun Mataram. Teu kasawang, ku teknologi patalimarga jaman harita, jeung kumaha sieunna rahayat Sunda ku Sultan Agung,moal aya nu wani nyokot layon Dipati Ukur ,pikeun dikubur di tanah Sunda. Kakawasaan Mataram di Sunda beuki jero napakna. Utamana di basisir kaler, loba pasukan Mataram nu teu baralik deui, tapi bumen-bumen, karawin ka urang dinya. Pikeun kahirupan, sesa prajurit Mataram teh, nyarieun sawah di Karawang. Padahal umumna di tatar Sunda mah harita ngahuma. Gorehel weh katangen, kacatet dina sajarah, aya tilu manusa Sunda Linuhung, nu wani ngorbankeun dirina demi kayakinan jeung ajen diri; Prabu Maharaja Linggabuana (aki buyutna Prabu Siliwangi) gugur di Bubat, Dipati Ukur, jeung R Otto Iskandar Di Nata (Si Jalakharupat). Kawas nu kajiwaan sumpah Bubat, nu unina: Nihan ta wuwusna rudiarana iking Bubat shaba, namung ksatriya Sunda tan atemahan ring nagara padajaya mami. (Najan banjir getih bedah di palagan Bubat, cadu ajen diri ksatrya Sunda ,ruksak di lemah cai sorangan.). Cag.

Bacaan:

Atja,Drs.jeung Ayatrohaedi,Dr. Nagara Krtabhumi ,Sundanologi,1986,Bandung
Djenal,Abidin,Drs.,Mengenal Kadaleman Kawasen,YPI Al Hidayah,2001,Ciamis.
Ekadjati,Suhardi,E,Dr.Carita Dipati Ukur Karyasastra Sejarah Sunda,Desertasi,UI,1979,Jakarta.
———-,dkk.Sejarah Revolusi Kemerdekan Daerah Jawa Barat, Proyek Inventarisasi dan Dokumentasi Kebudayaan Daerah,1980/81,Bandung.
Hermansumantri,Emuch,Dr,Sejarah Sukapura Sebuah Telaah Filologis,Desertasi, UI,1979,Jakarta.

Sajak Sayudi

2009-01-24T22:42:00.000-08:00

Lalaki di Tegal Pati

Tjitraresmi sari wangi

si lenjang bulan ngalangkang

sampulur miindung layung

Rampayak mirupa merak

sampayan kembang kamelang

kembang dada Sri Baduga

nu ngageugeuh taneuh pageuh

di buana warna-warna.

Geulis kaasih pohaci

kacapangan para raja

di bumi terusing langit

bumi ancikan lalaki

langit ancikan birahi.

Diugung ugung ku degung

ditimang-timang ku gondang

atina dina kacapi

rasana diri manusa.

Raratan ka tatar wetan

ngalengkah-lengkah ka Bubat

cundukna lain rek taluk

datang lain rek sumerah

seja nyungsi janji diri

seja nguji ku pangaji.

Lampah diala ku Raja

nu ngawasa tatar wetan

sejana didama-dama

diugung papayung agung

tanjakan angkat ka Bubat

mun cunduk nunggu saisuk

baris dipapag jampana

baris diarak ku pesta.

Cag :

teundeun ingkeun urang ceungceum

tunda satengahing dada

rabut ka puhu papay ka akar

geus dibeuweung caritakeun

urang buru bukur galur

urang papay pileumpangna

bisi kalangkungan saur

bisi kacampelak kecap.

Sapat lampahna ku niat

dijajap para satria

samakta pakarang perang

bisina aya dodoja

bisina aya cocoba

banteng nyeta gajah meta.

Kolebat tegalan Bubat

pasangrahan supa mayak

umbul-umbul hulu maung

rurumbe temeng ranggeteng

Nya gehger geger ku iber

gelap ninggang pabeubeurang

beja pabentar ti sangka.

Ratu tipu ! Raja nista !

subaya dipulang cidra

nu Geulis dipulang keris.

Renjag para sinatria

sareundeuk ngabeubeut seuneu

sarindat singa bayangan

hurung tihul na jajantung.

Saur manuk rampak sumpah

satria mo incah sembah

bongan lampah dicacampah.

"Clik getih clak nanah

mo inggis ku congo keris

hamo gedag dibibira

buyut nya biluk ka musuh

satia ka Pajajaran"

Sakolepat pindah cupat

reueuk deuleu ku kaceuceub

langit dihuru ku napsu

tegal diampar amarah.

Sawidak ahad tatandang

pasir kalindih ku getih

nya tegal tempat ngajagal.

Eundeur bengeut-beungeut dayeuh

kasurak ku balarea

Raja Pajajaran tandang.

Iblis-iblis ting puringis

setan-setan ting puringkak

ngabedega Sri Baduga

jirim sajungkiring pasir

tangtung saluhur Galunggung

sapuringkak bulu landak

urat-urat Sangkuriang

diaping para prajurit

dijaga para satria.

Nenjrag bumi tilu kali

oyag lemah sajajagat

tingkoceak urang Bubat.

Gaur saur putu Galuh

mapat aji-aji diri

nya saur guludug urug

ngareuhak paralak ruhak.

"Lalaki aing lalaki

tukang nguyup getih jurit

tukang ngakan bayah perang

geura datang Raja cidra

geura datang sato jalma

papagkeun aing ku tumbak

jajapkeun ku tungtung duhung

nya hulu aing Citanduy

hate aing Cisadane

nunjang ngulon Ujungkulon"

"mun saat tara paragat"

Tungkeb balad sajajagat

ngala nyawa Maha Raja

ngagilir Kujang anggoan

sihungna Guriang Tujuh

sipuhan Jaksa salapan

diringkukan Raja Teluh

ditunggu maung sapuluh

cipangasah peurah naga

panigas dua harerang

seuseukeut dua paneuteup

nu hiji ngancik na ati

kadua napak di dunya.

Humandeuar Raja cidra

nyawa diancam cangcaya

umur katungkul ku kubur

jajaten kapeped manten.

Metu tipu rikip licik

ngutus pandung gudang burang

nu weduk ukur di lembur

anu bedang bayah belang

Papatih ati jejerih.

Entrang-entrang tengah beurang

panonpoe bahe ngaler

samagaha ninggang uga

kila-kila aya baya.

Mangsa layung ngembang gunung

jurit kasapih ku burit

tangara ngahalang perang

Sri Baduga mulang nukang

Kujangna merod ngacacang

bawana teu daek mulang

ciri aya nu nyamuni

paler soteh ku pamepes.

Sajorelat pedang mesat

nigas jangga Sri Baduga

dihanca sawelas hanca

ditindak sawidak nindak

kahiji teu busik-busik

kadua teu ceda-ceda

katilu teu metu urut

kaopat taya tapakna

ukur malipis palipis

ukur ngangkang luhur tarang

liat kulit batan keris

teuas tulang batang pedang

panigas kalahka peunggas.

Maha Raja maseuk taneuh

tohaga kuda-kudana

nyawedel adeg-adegna

hanteu kaunggutan gugup

hanteu gigis bulu bitis

malik gigir lawan ngejat

ngusap birit Patih indit.

"Pangira lalanang perang

rupa gajah atah warah

nya hate gede tampele

ti hareup teu wasa neuteup

ti tukang daek ngawengkang"

Ki Patih malipir hinis

seber wawanen ngaladen

dilieuk ngabeungeut bueuk

undur laku ka jauhna

nunggu-nunggu waktu mulus.

Kebat lampah Sri Baduga

sajuringkang lengkah dangah

mipir mayit nyukang bugang

nya mapay-mapay babatang.

Katurih-turih ku pikir

kasuat-suat ku rasa

galindeng nu impleng-impleng.

"Rumasa aing nandasa

sajalma nu boga cidra

tan kawilang nu harilang

lalaki aing samisti

asih ka pangaji diri

taroh umur bela lembur

sasaji bali ngajadi"

Srangenge tomper ka kaler

harieumbeungeutna reueuk

tiis jahe hangru bangke

pasangrahan pada lungse.

Cihcir ngurilingan peuting

majuna ka tengah dalu

bulan ditaleukeum ceudeum

hiur angin ngayuh tunduh

mirig peuting sungkan nyaring

gempar balad Pajajaran.

Tengah dalu nunggu isuk

nya nyukang carangcang tihang

gugah Maha Raja gugah

cucul-cucul duhung tarung

dilaan Kujang anggoan

rep sidakep mapat rajah

ngujur ngidul ngayuh kidung

menekung ka Sang Rumuhun

neneda ka Nu Ngayuga.

Sang Rumuhun dina kurung

nu Ngayuga dina rasa

ngahiji dina dirina

nguculkeun sagala napsu

ngicalkeun rupa kahayang

mepes sagala jajaten

neang manusa nu dakwa

neang lalaki nu bakti.

Kojengkang papatih curang

nya nyamuni di nu suni

anu nyumput di nu singkur

anu nganti ti tatadi

ngadu tarang teu kasawang

ti tukang sok susuganan.

Nu menekung junun tangtung

nu curang sawenang-wenang

milih kulit anu ipis

bisi meulit kana bitis

bisina malindes tenggek.

Suruduk duhungna mangprung

newekna sataker kebek

sakali keris ngagaris

nu kadua nyasar dada

katilu cunduk ka wuku.

Geleger lemah ngageder

gunung-gunung mungguh urug

angkub satungkebing peuting

gelap ngampar ngadak-ngadak

pada muni

pada nyaksi.

Buriak pengeusi Bubat

koceak nyambat karamat

pangira dunya pralaya.

Ki Patih kapicis miris

kasima dangiang Raja

melesat sang Kujang luncat

bebela ka Sri Baduga

sajorelat Patih ngejat

diobrot ka mana anjog

satungtung laku titipu.

Ngarumpuyuk Ratu Agung

titis-tulis nitih wanci

ngahanju dibarung ngidung

sasajina geus katampi

pupus puguh keur menekung

hilang pedah keur ngarajah.

Genjlong nonggong turun laun

jajap napas Maha Raja

ngembat-ngembat bulan mayat

mapag nyawa Sri Baduga.

Sakereles geger ngiles

sabaranyay bulan ngempray

moncorong nyorot ka layon

dipirig ku wawangian

disambat ku kekembangan.

Beuki leutik bulan indit

beuki seungit layon demit

beurang ngangkang layon ilang

nu tinggal raratanana

anu kari lalakina

tilem jero angen-angen

ngahiji jeung katumbiri

nutug leuwi-leuwi diri

ngahiang di para bujang

nu malire Cisadane

nu sanggup ngabendung Bandung.

Cag :

teundeun eunteungeun

tunda ayakeun

cangcang dina tulang-tulang

geus dibeuweung dipakukeun

dina cupu hulu laku

dina padaringan ati

urang teang balukarna.

Kawarti ka Tjitraresmi

Ratu Punjul puput umur

pada tihang Pajajaran

nu Geulis katurih eurih

nu Geulis medal citangis

nyamiripis hujan ipis

lieuk paneukteukkan beuheung

sareret bangke ngaberes

para satria geus sirna.

Para istri geus lastari

ngamukna ajur-ajuran

ngalabrak anggeus-anggeusan

ngiring sasaji ka Gusti

milu tuturut ka Ratu.

Alumna kuwung-kuwungan

sedihna jeg kingkilaban

galindeng terusing ati

kari milih-milih wanci

nya tinggal nataan mangsa.

"Batan taluk kajeun undur

batan pasrah kajeun hilang

cadu kasiku ku musuh

pantrang karagap ku lawan

jeung pasrah ka Raja cidra

mending rarabi ka pati"

Sagerentes angen tetes

disaksi para pohaci

rep sidakep mapat rajah

nya rajah-rajah pamunah

pamunah sagala rasa

anu ngacacang di dunya

museurkeun sagala pikir

nu ngancik di bumi lahir

ngageuing mulih ka jati

sangkan naratas jalanna.

Dilagar wangkinganana

dibebener kana angen

dilelebah kana manah

rep sarerep sirep

wangkingan malang na raga

Tjitraresmi labuh pati.

Hiuk angin wawangian

mirig Putri nu lastari

dipapag ku katumbiri

nu tinggal raksukanana

anu kari lalakina

nya sampeureun para istri.

Cag :

Tutug laku

pungkas kecap

teundeun paseukeun

tanda pelakeun

susun na tangtung

entep na hate

kari neuteupkeun ka hareup

tinggal nyawang ka nu anggang

mangka ludeung ku katineung

waspada ku pangaboga.

Urang tutup galur catur

padakeun tepi dinya

Bral !
Tina Lalaki di Tegal Pati.

Katerangan :

SAJUDI dilahirkeun di Bandung. Sanggeus namatkeun SMP nuluykeun ka Konservatori Karawitan Sunda, bari digawe di Kantor Pos Besar Bandung. Kajaba nulis dina basa Sunda, sok nulis dina basa Indonesia dimuat dina majalah-majalah Kisah, Indonesia, Puspa Wanita.

Tulisanana dina basa Sunda dimuat dina Warga, Mangle jeung Sipatahoenan. Ku penerbit Kiwari Bandung, dikaluarkeun kumpulan sajakna nu mimiti, nu mangrupa kumpulan sajak munggaran dina basa Sunda (1963)

Antos dina update-tan sasih Maret bade dimuat : Sajak Sayudi ka II.Cag

................................................................................................

Kajadian Perang (pembantaian ?) di BUBAT

Kajadian Perang BUBAT geus anggeus, sabab Prabu Hayam Wuruk menta dihampura ka Sunda (Kawali) ditarima ku Prabu Bunisora (Raina Prabu Lingabuana anu gugur di Bubat). Kajadian Perang Bubat teh dina poe Salasa saecan tengah poe. Sedengkeun menta dihampurana Hayam Wuruk ka Sunda dina taun 1357 M.

Naon sababna Patih Gajah Mada (Patih Mada) diusir ?.
Sanggeus Prabu Hayam Wuruk nyaho yen iring-iringan Raja Sunda bari mawa pibojoeunana, Dewi Tjitraresmi ( ngaran pamere akina, sedeng ti ramana mah Dyah Pitaloka lahir taun 1339 M ) nemahan pati alatan digempur Patih Gajah Mada, Sang Prabu kabungbulengan nepi ka gering salila tilu bulan. Geus kitu Sang Prabu ngayakeun gotrasawala jeung para panglima nagara ngeunaan kajadian di Bubat. Breh we katembong yen anu boga hadas ieu teh Patih Gajah Mada. Kukituna Sang Prabu marentahkeun pasukan bayangkara karajaan supaya Gajah Mada ditangkep, ngan hanjakal aya nu ngabejaan mata-matana Gajah Mada. Atuh Gajah Mada ngalolos ti nagara. Tapi sanggeus sababara taun, Hayam Wuruk kawin ka putri Raja Wengker, Ratu Ayu Kusumadewi, Gajah Mada di hampura sarta dibere kalungguhan jadi patih deui di Majapahit.

Parentah nangkep Patih Gajah Mada lantaran Hayam Wuruk nganggap yen Gajah Mada geus ngarempak sumpah Raden Wijaya (anu ngadegkeun Majapahit), ka Prabu Darmasiksa(Raja Sunda), akina di Karaton Surawisesa , nu moal wani-wani ngaganggu bhumi Sunda.(Nagara Kertha Bhumi bagian IV kaca 28).****

Ieu Kajadian Bubat teh aya dina Pustaka Nusantara II/2 sarua jeung anu aya dina Pustaka Pararatwan (Bhumi Jawadwipa I/2) Cag.

Dina kaca sanes, Peristiwa Bubat" dumasar naskah kuno Wangsakerta. Mangga pilari !!

Sajak Ki Umbara

2009-01-24T03:05:00.000-08:00

Murahing Pangeran

Taun-taun henteu dipareng batian
panakane henteu aral ngarasula
tutulisan geus aya ti kalamula
iklas hate teu ngaborongkeun Pangeran

Rahmat Gusti lir cai pancuran herang
ngagelenggeng mayeng ngocor ngagolontor
henteu kiruh sumawonna lamun kotor
matak seger diinum ku nu hanaang

Ngucap sukur ka Allah nu sipat murah
geus keresa maparin panjang lalakon
gunung gede, gede keneh hate anu diijabah

Pamungkasna : " Ya Allah mugia eta titipan
mulus banglus hirup huripna teu mubah
mapay jalan nu dipirido ku anjeunna."

Dimuat dina Warga No.62 tgl. 20 Mei 1953

Katerangan :

Sandiasma ngaran aslina W.Ranusulaksana. Lahir di Bendungan,Luragung, Kuningan
tanggal 10 Juli 1914. Taun 1933 namatkeun Normaalschool Serang, sarta ngajar di sababaraha tempat. Taun 1954 lulus S.G.A, saterusna jadi Kapala SMP Muslimin III Bandung.
Dina mangsa samemeh perang sok nulis dina majalah Parahiangan. Tulisan anu kaitung rada panjang judulna Djodo Pamindo ( Parahiangan 1937). Salian di Parahiangan, oge dina Timbangan (Tasikmalaya). Kalan-kalan osok nulis oge dina basa Indonesia.

...............................................................................

Saha ari AKI TIREM ?

Padumuk anu asalna ti Yaman Kulon, India Kidul anu aya di Lampung, daratang bari marawa anak incu saborondoyot pindah ka Jawa Barat, ngadegkeun kapuunan (satingkat RW) anu pupuhuna disebut Puun/panghulu/ratu/ pamingpin sorangan anu ngaran Aki Tirem Sang Aki Luhur Mulya. "Predikat AKI" sigana meunang harti geus kolot atawa gelar kahormatan kanu geus dikolotkeun ( Indonesiana mah "dituakan"). Ngaran wewengkona disebut Rajatapura anu ku urang Yunani disebut Algire. Ieu Rajatapura teh ayana di IABADIO (Jawa Barat) bagian Kulon, deukeut jeung APUYNUSA/pulo seuneu (Gunung Krakatau). Ngadegna kapuunan saecan taun 130 M, lantaran dina taun 130 M, sanggeus kadatangan Dewawarman ti wangsa/dinasti CALANKAYANA,Rajatapura mekar jadi ibukota karajaan SALAKANAGARA.
Taun 130 M kapamingpinan AKI TIREM SANG AKI LUHUR MULYA diserahkeun ka minantuna ,Dewawarman anu kawin ka LARASATI anakna Aki Tirem. Tidinya, eta kapuunan teh ngadeg jadi hiji karajaan SALAKANAGARA ibukotana RAJATAPURA.

Raja pamungkas SALAKANAGARA nyaeta minantu Dewawarman ka 8 anu mindahkeun karajaan ka derah basisir Kaler (Bekasi ayeuna), ngadeg weh karajaan TARUMANAGARA anu ibukotana SUNDHAPURA.

....................................................................................................
Jadi kudu dikoreksi, ahli sajarah nu nulis dina sajarah Indonesia keur barudak,nyebutkeun yen “Kerajaan Tertua di Jawa Barat, Tarumanegara, rajanya Purnawarman (wungkul)" Kecap tertua ge teu keuna, sabab nu pangkolotna mah Salakanagara nu ngadeg taun 130 M.nepi ka taun 363 M. di wewengkon Pulasari Pandeglang. Jadi 400 taun samemeh jungjunan alam Rosululloh SAW lahir, di Sunda geus aya system pamarentahan, tatanen,jeung kaamanan. Cag

SAJAK : HASAN WAHYU ATMAKUSUMAH

2009-01-24T00:42:00.000-08:00

Sangkuriang

sangkuriang ngaran kuring
ti beurang tukang caringcing
ti peuting tukang ngalinjing
neangan indung nu nundung
ah ! kuring hirup nyingkahan kabingung
nyingkahan rurubed nu jolna ti aing
bongan kiwari geus taya wanci mustari
rea teuing sangkuriang
geus musna beurang
alam geus ilang dangiang
tinggal peuting anu panjang
cul hanca, ngadukduk acong-acongan
cul raga, muru-muru nu can karuhan

sangkuriang ngaran kuring
nu di bapaab ku badega
dan bongan indung nu linglung
ngucap janji tanpa ungang-ungang
indung ! bongan saha medalkeun sangkuriang
kitu cek ajali
tangtu kaharti
tapi saha ? dayang sumbi ngudar ucap
apan cek tadi
sangkuriang baris mondong nyai putri
nu ninun puluh taun
tapa bari sewot kana barera
bongan geus nyieun carita
ngagurat di nu kiwari
alam ! anjeun musuh nu weduk ku teluh
nu ngayuga ! ieu kuring geuwat ropea
ulah dijieun teundeun poho
bisi dunya ditangtang ka tengah kalang tanpa sisi

sangkuriang ngaran kuring ! prak raponan
samemeh dunya awut-awutan, panonpoe disosoeh
samemeh balebat ngan kari urut
bongan geus nyieun ebat
ka sangkuriang anu linglung
eh istijrad ! nyata anjeun teu beunang dipisobat
tangtu ku aing ditenjrag
ieu aing sangkuriang
menta hurip mangsa bulan mun geus kembar
raja napsu rek dikencar-diumbar.

Rakata, 20 - 11 - 1955
dimuat dina Panghegar no.69 taun IV tgl. 1 Juli 1955

Katerangan :

Ngaran lengkepna Raden Undang Hasan Wahyu Atmakusumah Prawirasoebrata, lahir di Garut
tanggal 27 Sapar 1353 Hijriah (1934) M).
Sanggeus milu kuliah di PTAIN Yogjakarta meunang dua taun, terus nuluykeun sakola di Perguruan Tinggi Jurnalistik Jakarta, bari digawe jadi Pangatur Tata Usaha Departemen Kepolisian. Taun 1953 jadi wartawan Sipatahoenan, 1954 redaktur Lekra bandung, 1956 - 1957 pamingpin majalah Criterium Yogjakarta.
Karanganana dimuat di : Warga, mangle, Sunda,Budaya, Vivat, Mimbar Indonesia,Criterium mangrupa sajak, carpon esey. Di Sipatahoenan nulis reportase.

.................................................................................................................

Baduy ?

Aya samentawis rerencangan anu naroskeun ka sim kuring ; Ari Baduy teh leres rayat Prabu Siliwangi ? Waleranana : SANES, Baduy mah rahayat Pajajaran. Mung dugi ka ayeuna nyamunikeun maneh, margi karuhunna alim ngaku yen manehna teh rahayat Pajajaran. Nya turun-tumurun dugi ka ayeuna, mun disebat rahayat Pajajaran teh sok ngambek.

Kieu anu sakaterang sim kuring mah, ieu oge nanaroskeun ka ahli sajarah Sunda.

Waktos Prabu Siliwangi ( Nami SILIWANGI teh mung saukur gelar ti rayatna, ari anu asli mah mangga aos Catetan Prabu Siliwangi di handap ieu ) masih ngabahudenda di Pajajaran, taya saurang Raja anu wani nyerang. Tapi saatos Prabu Siliwangi pupus (tilem = sami sareng maot) Pajajaran di gempur ku tilu Karajaan Islam nyaeta : Demak, Cirebon sareng Banten. Pajajaran diserangna oge saatosna 58 taun Prabu Siliwangi pupus ( 1521 M - 1579 M ).
Diserang ti tilu madhab pasukan Islam teu tiasa lebet ka karajaan, margi sakuriling karajaan dikuriling ku "parit", oge Gerbang karajaan geus make sistim angkat jungjung sapertos jambatan walungan Musi di Palembang. Tapi dijero aya salah saurang tentara karajaan anu tos Islam, ngabuka gerbang. Sadayana para tentara perlaya, tapi sadayana rayat Pajajaran salamet. Janten, tentara karajaan Islam jaman baheula mah maehan teh sanes ka rayat, tapi ka tentara sareng para pamingpinna (na ari ayena ? conto Palestina). Waktu harita sabagian rayat pajajaran lolos ti karaton nuju ka gunung Kendan. Padahal, eta tempat teh nampeu pisan jeung Banten. Tah tiharita rayat Pajajaran nyebut dirina urang Baduy. Matak nepi kaayeuna urang Baduy mah aralimeun disebat urang Pajajaran, bisa-bisa ambekkeun. Cag

Catatan leutik, ngeunaan Prabu Siliwangi

Jenengan nuju alit: Pamanahrasa, saparantos jadi prabu anom robih jadi Jayadewata.

Jayadewata, teh incu munggaran Prabu Wastukancana (Prabu Wangisuta). Jayadewata diistrenan jadi raja 2 kali. ngawitan ku Prabu Dewa Niskala, jadi raja GALUH, kadua ku Prabu Susuk Tunggal (mertua) jadi Raja Pajajaran, gelar SRI BADUGA MAHARAJA SRI SANGRATU DEWATAPRANA.Dua karajaan dihijikeun, sapertos ku Wastukancana Gelar Siliwangi kaceluk ku rahayat GALUH. pedah sikep tur perilakuna sarimbag sareng Prabu Wangi (Eyang buyutna nya eta Prabu Maharaja,nu gugur di BUbat, nya kitu seueur sarimbag sareng sikep Prabu Wastukancana/Prabu Wangisuta, (eyangna) nu leuwih condong merhatikeun rahayat, tur teu mikaresep kamewahan dunya.. Eta sababna dianggap sarua jeung Prabu Wangi, Dijadikeun pangganti Prabu Wangi, disebut we SILIHWANGI/ SILIWANGI. Istri munggaran Siliwangi, NYI RAMBUT KASIH, putri Ki Gedeng Sindangkasih(Pamanna), teu gaduh putra. Ti istri kadua, NYI SUBANGLARANG putri pamanna keneh, Ki Gedeng Tapa). Subanglarang tos Islam, alumnus pesantren SYEH QUROO di Karawang.. Istri katilu, adi Prabu Amuk Murugul (putra Ptabu Susuk Tunggal), NYAI KENTRING MANIK MAYANG SUNDA gaduh putra SURAWISESA(putra mahkota,engkena jadi raja Pajajaran. ti Nyai Subanglarang, kagungan putra, WALANGSUNGSANG (ngadegkeun karajaan Islam Cirebon), RARASANTANG, jeung JAKASENGARA.tiluanana ISLAM. Cag